വാട്സ്ആപ്പ് ഉപയോക്താക്കൾക്ക് വീഡിയോ കോളുകൾ കൂടുതൽ ആകർഷകമാക്കുന്നതിനായി പുതിയ ഫീച്ചറുകൾ അവതരിപ്പിച്ചിരിക്കുകയാണ്. വീഡിയോ കോളുകളിൽ ഇഫക്ടുകൾ ചേർക്കാൻ കഴിയുന്ന ഫിൽറ്റർ ഓപ്ഷനും, ബാക്ക്ഗ്രൗണ്ട് മാറ്റാൻ കഴിയുന്ന ഓപ്ഷനുമാണ് പുതുതായി ലഭ്യമാക്കിയിരിക്കുന്നത്. ഫിൽറ്റർ ഉപയോഗിച്ച് സ്പ്ലാഷ് പോലുള്ള ഇഫക്ടുകൾ വീഡിയോയിൽ ചേർക്കാൻ സാധിക്കും.
ബാക്ക്ഗ്രൗണ്ട് ഓപ്ഷനിൽ 10 വ്യത്യസ്ത തിരഞ്ഞെടുപ്പുകൾ ലഭ്യമാണ്. ഇതിൽ ബ്ലർ ഓപ്ഷൻ പ്രത്യേകം ശ്രദ്ധേയമാണ്. ഔദ്യോഗിക മീറ്റിങ്ങുകളിലും മറ്റ് പരിപാടികളിലും പങ്കെടുക്കുമ്പോൾ സ്വകാര്യത നിലനിർത്താൻ ഈ ഫീച്ചർ സഹായകമാകും. സ്റ്റൈലിഷ് ബാക്ക്ഡ്രോപ്പുകൾ ചേർത്ത് കോളുകൾ കൂടുതൽ ആസ്വാദ്യകരമാക്കാനും സാധിക്കും.
കൂടാതെ, മങ്ങിയ പ്രകാശ സാഹചര്യങ്ങളിൽ വീഡിയോയുടെ തെളിച്ചം വർധിപ്പിക്കാൻ സഹായിക്കുന്ന ലോ ലൈറ്റ് ഓപ്ഷനും വാട്സ്ആപ്പ് അവതരിപ്പിച്ചിട്ടുണ്ട്. ഇത് വീഡിയോയെ കൂടുതൽ വ്യക്തവും വൈബ്രന്റുമാക്കും. ഈ പുതിയ സവിശേഷതകൾ വരും ആഴ്ചകളിൽ എല്ലാ വാട്സ്ആപ്പ് ഉപയോക്താക്കൾക്കും ലഭ്യമാകുമെന്നാണ് അറിയിച്ചിരിക്കുന്നത്.
