ന്യൂഡൽഹി :രാജ്യത്തെ ഡിജിറ്റൽ ഇടപാടുകൾ കൂടുതൽ സുരക്ഷിതമാക്കുന്നതിന്റെ ഭാഗമായി യൂണിഫൈഡ് പേയ്മെന്റ് ഇന്റർഫേസ് (UPI) നിയമങ്ങളിൽ വിപ്ലവകരമായ മാറ്റങ്ങൾ പ്രഖ്യാപിച്ച് റിസർവ് ബാങ്കും കേന്ദ്ര സർക്കാരും. ഏപ്രിൽ ഒന്ന് മുതൽ പ്രാബല്യത്തിൽ വരുന്ന പുതിയ മാർഗനിർദേശങ്ങൾ പ്രകാരം, എല്ലാ യുപിഐ ഇടപാടുകൾക്കും ഇനി മുതൽ ബയോമെട്രിക് പരിശോധനയും ഒടിപിയും (OTP) നിർബന്ധമാക്കും. ഗൂഗിൾ പേ, ഫോൺ പേ, പേടിഎം തുടങ്ങിയ എല്ലാ പ്രമുഖ യുപിഐ ആപ്പുകൾക്കും ഈ നിബന്ധന ബാധകമായിരിക്കും.
വർധിച്ചുവരുന്ന സൈബർ തട്ടിപ്പുകളെ തടയുന്നതിനായി നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (NPCI) ഏർപ്പെടുത്തുന്ന ഈ 'രണ്ട് തല സുരക്ഷാ സംവിധാനം' വഴി സാമ്പത്തിക സുരക്ഷ ഉറപ്പാക്കുകയാണ് ലക്ഷ്യം.
പുതിയ സുരക്ഷാ ക്രമീകരണങ്ങൾ ഇങ്ങനെ:
* ബയോമെട്രിക് ഓതന്റിക്കേഷൻ: നിലവിൽ പിൻ (PIN) നമ്പർ മാത്രം ഉപയോഗിച്ച് നടത്തിയിരുന്ന ഇടപാടുകൾക്ക് ഇനി മുതൽ വിരലടയാളമോ (Fingerprint) ഫേസ് സ്കാനോ നിർബന്ധമാക്കും.
* ആറക്ക ഒടിപി: ബയോമെട്രിക് പരിശോധന കഴിഞ്ഞാലുടൻ രജിസ്റ്റർ ചെയ്ത മൊബൈൽ നമ്പറിലേക്ക് ആറക്ക ഒടിപി ലഭിക്കും.
* സമയപരിധി: ലഭിക്കുന്ന ഒടിപിക്ക് 30 സെക്കൻഡ് മാത്രമേ കാലാവധി ഉണ്ടായിരിക്കുകയുള്ളൂ. ഈ നിശ്ചിത സമയത്തിനുള്ളിൽ ഇടപാട് പൂർത്തിയാക്കിയില്ലെങ്കിൽ അത് താനേ റദ്ദാക്കപ്പെടും.
വ്യാജ എപികെ (APK) ഫയലുകൾ ഉപയോഗിച്ച് സ്മാർട്ട്ഫോണുകളുടെ നിയന്ത്രണം തട്ടിപ്പുകാർ ഏറ്റെടുക്കുന്നത് തടയാൻ പുതിയ സംവിധാനം സഹായിക്കുമെന്ന് അധികൃതർ വിലയിരുത്തുന്നു.
അന്താരാഷ്ട്ര ഇടപാടുകൾക്ക് കടുത്ത നിയന്ത്രണം:
വിദേശ രാജ്യങ്ങളിൽ നിന്നുള്ള സൈബർ തട്ടിപ്പുകൾ പ്രതിരോധിക്കാൻ അന്താരാഷ്ട്ര യുപിഐ ഇടപാടുകളിൽ പ്രത്യേക നിരീക്ഷണം ഏർപ്പെടുത്തി. ഇത്തരം ഇടപാടുകളിൽ പണമയക്കുന്നയാളുടെയും സ്വീകർത്താവിന്റെയും തത്സമയ ലൊക്കേഷൻ സിസ്റ്റം സ്കാൻ ചെയ്യും. കൂടാതെ, സുരക്ഷാ മുൻകരുതലായി കാപ്ച (Captcha) പൂരിപ്പിക്കലും അന്താരാഷ്ട്ര ഇടപാടുകളിൽ നിർബന്ധമാക്കിയിട്ടുണ്ട്. പുതിയ മാറ്റങ്ങൾ മൂലം പേയ്മെന്റ് പൂർത്തിയാക്കാൻ അല്പം കൂടുതൽ സമയം എടുക്കുമെങ്കിലും, ഓൺലൈൻ സാമ്പത്തിക തട്ടിപ്പുകൾക്കെതിരായ ശക്തമായ പ്രതിരോധമായി ഇത് മാറുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.
