ന്യൂഡല്ഹി: ഫേസ്ബുക്ക്, ഇൻസ്റ്റാഗ്രാം, ജിമെയില്, നെറ്റ്ഫ്ലിക്സ് ഉള്പ്പെടെയുള്ള സോഷ്യല് മീഡിയ, ഒടിടി പ്ലാറ്റ്ഫോമുകളിലെ 149 ദശലക്ഷത്തിലധികം പാസ്വേർഡുകള് ചോർന്നതായി റിപ്പോർട്ട്.
സുരക്ഷാ ഗവേഷകനായ ജെറമിയ ഫൗളർ പുറത്തുവിട്ട റിപ്പോർട്ട് ഉപയോക്താക്കളുടെ സ്വകാര്യതയെ സംബന്ധിച്ച ഗുരുതര ആശങ്ക ഉയർത്തുന്നു.
വിവരങ്ങള് പൊതുജനങ്ങള്ക്ക് ആക്സസ് ചെയ്യാനാവുന്ന രൂപത്തില് ഓണ്ലൈനില് ലഭ്യമായിരുന്നുവെന്നും ഫൗളർ പറഞ്ഞു.
സോഷ്യല് മീഡിയ അകൗണ്ടുകള്ക്ക് പുറമേ ധനകാര്യ സേവന അക്കൗണ്ടുകള്, ക്രിപ്റ്റോ വാലറ്റുകള്, ട്രേഡിംഗ് അക്കൗണ്ടുകള്, ബാങ്കിംഗ്, ക്രെഡിറ്റ് കാർഡ് വിവരങ്ങളും ചോർന്നതായി ഫൗളർ അവകാശപ്പെട്ടു.
നിരവധി രാജ്യങ്ങളില് നിന്നുള്ള '.gov' ഡൊമെയ്നുകളുമായി ബന്ധപ്പെട്ട ക്രെഡൻഷ്യലുകള് ചോരുന്നത് ഗൗരവുമുള്ള സാഹചര്യമാണെന്നും അദ്ദേഹം പറഞ്ഞു.
എന്നാല് ഓണ്ലൈനില് ലഭ്യമായ എല്ലാ വിവരങ്ങളും ഇതിനകം തന്നെ നീക്കം ചെയ്തിട്ടുണ്ട്. പക്ഷെ ഇതുമായി ബന്ധപ്പെട്ട് എത്രത്തോളം നാശനഷ്ടങ്ങളോ ഡാറ്റ ചോർച്ചയോ സംഭവിച്ചുവെന്ന് അറിയാൻ ഒരു മാർഗവുമില്ലെന്ന് ബ്ലാക്ക് ഡക്കിലെ സീനിയർ സെക്യൂരിറ്റി എഞ്ചിനീയർ ബോറിസ് സിപോട്ട് പറഞ്ഞു.
ഉപയോക്തൃ ഉപകരണങ്ങളെ ബാധിക്കുകയും അവരുടെ ഇൻപുട്ടുകള് രേഖപ്പെടുത്തുകയും ചെയ്യുന്ന ഇൻഫോസ്റ്റീലിംഗ് മാല്വെയർ ഉപയോഗിച്ചാണ് വിവരങ്ങള് ചോർത്തിയതെന്ന് കരുതുന്നതായി ജെറമിയ ഫൗളർ പറഞ്ഞു.
ഇൻസ്റ്റാഗ്രാമിൽ മാത്രം 1.75 കോടി ഉപയോക്താക്കളുടെ വിവരങ്ങൾ ചോർന്നു. ഇൻസ്റ്റാഗ്രാമിൽ നിന്നും ചോർന്ന വിവരങ്ങൾ ഡാർക്ക് വെബിൽ പ്രചരിക്കുന്നുണ്ട് എന്ന് റിപ്പോർട്ടുകൾ ഉണ്ട്.
ഉപയോക്താക്കളുടെ യൂസർനെയിം, ഫോൺ നമ്പർ, ഇമെയിൽ വിലാസം എന്നിവ ഉൾപ്പെടെയുള്ള വ്യക്തിഗത വിവരങ്ങൾ ചോർന്നവയിൽ ഉൾപ്പെടുന്നു
