ഇടുക്കി ജില്ലയിലെ കുടയത്തൂരിൽ ഉരുൾപൊട്ടലുണ്ടായപ്പോൾ ഇടുക്കി ജില്ല കെ-9 സ്ക്വാഡിൻ്റെ കഡാവർ നായയായ എയ്ഞ്ചൽ മൃതദേഹങ്ങൾ കണ്ടെത്തിയപ്പോൾ മുതൽ എല്ലാവരും ചോദിച്ച ഒരു ചോദ്യമായിരുന്നു എന്താണ് കഡാവർ നായ?
ഇടുക്കി ജില്ലയിലെ കുടയത്തൂരിൽ നടന്ന ഉരുൾപൊട്ടലിൽ മണ്ണിനടിയിൽപെട്ടവരുടെ മൃതദേഹങ്ങൾ കണ്ടെത്തിയ കേരള പോലീസ് ഇടുക്കി ജില്ലാ K9 സ്ക്വാഡിലെ ഏയ്ഞ്ചൽ ഹാൻലറായ ജിജോയ്ക്കൊപ്പം
ഇന്ന് അധികം അത്ര കേട്ടിട്ടില്ലാത്ത ഒരു നായയറിവ് പങ്കിടാം. ആദ്യമെ ഇതൊരു നായ ജനുസ്സ് അല്ലെന്ന് മനസ്സിലാക്കണം. നമ്മുടെ സേനകളിലെല്ലാം നായ്ക്കളെ പല കാര്യങ്ങൾക്ക് വേണ്ടി പരിശീലിപ്പിച്ച് ഉപയോഗിക്കുന്നുണ്ട്.
കൊലപാതകം,മോഷണം തെളിയിക്കാൻ ട്രാക്കർ നായ്ക്കൾ, സ്ഫോടക വസ്തുക്കൾ കണ്ട് പിടിക്കാൻ എക്സ്പ്ലോസീവ് സ്നിഫർ, കഞ്ചാവ് പോലുള്ള വസ്തുക്കൾ കണ്ട് പിടിക്കാൻ നർക്കോട്ടിക് സ്നിഫർ, തുടങ്ങിയവ പോലെ ഒരു പ്രത്യേക കാര്യത്തിന് വേണ്ടി പരിശീലിപ്പിച്ച് എടുക്കുന്നവയാണ് ഇവരും, ഘ്രാണശക്തിയുടെ തലതൊട്ടപ്പന്മാരായ എല്ലാ നായ്ക്കളെയും ഇതിനായി പരിശീലിപ്പിച്ചെടുക്കുന്നുണ്ട്.
ഇനി ഇവരെ എന്തിനാണ് ഉപയോഗിക്കുന്നതെന്നറിയാം, പ്രധാനമായും ഒരു ശവശരീരത്തിന്റെ ഭാഗങ്ങൾ, സംയുക്തകോശങ്ങൾ, രക്തം, എല്ല് തുടങ്ങിയവ മണത്ത് കണ്ടെത്തി കുറ്റകൃത്യങ്ങൾ കണ്ടെത്താൻ സഹായിക്കുന്നു. ഒരു ശരീരം ജീർണ്ണിക്കുമ്പോൾ 400 തരത്തിലുള്ള രാസ സംയുക്തങ്ങൾ ഉണ്ടാകുന്നു എന്നാണ് പഠനങ്ങൾ പറയുന്നത്.
വിദേശ രാജ്യങ്ങളിലെ മിക്ക കുറ്റകൃത്യങ്ങളിലും കൊലപാതങ്ങൾ നടത്തിയതിന് ശേഷം ശരീരം പല ഭാഗങ്ങളാക്കി ഒളിപ്പിക്കുക, കുഴിച്ചിടുക, കത്തിച്ച് ചാരമാക്കുക, വെള്ളത്തിനടിയിൽ ഒളിപ്പിക്കുക തുടങ്ങി മൂടി വക്കാൻ ധാരാളം ശ്രമമുണ്ടായപ്പോഴാണ് കഡാവർ നായക്കളുടെ സാധ്യതകളെ കുറിച്ച് ചിന്തിച്ചു തുടങ്ങിയത്.
അങ്ങനെ ആദ്യമായി 1974ൽ അമേരിക്കയിലെ ന്യൂയോർക്ക് സ്റ്റേറ്റിൽ "പേൾ" എന്ന പേരുള്ള ഒരു ലാബ്രഡോർ കഡാവർ ആയി ട്രൈയിൻ ചെയ്തിറങ്ങി.നാലടി താഴ്ചയിൽ കുഴിച്ചിട്ട നിലയിൽ ഉള്ള ന്യൂയോർക്ക് സ്റ്റേറ്റിലെ സൈറാക്കസ് കോളേജിലെ സ്റ്റുഡന്റിന്റെ ശരീരം കണ്ടെടുത്ത് കൊണ്ട് പേൾ കഡാവർ നായ്ക്കളുടെ സാന്നിധ്യം കുറ്റാന്വേഷണ രംഗത്ത് ഒഴിച്ച് കൂടാൻ വയ്യാത്തതാണെന്ന് തെളിയിച്ചു. എന്നാൽ അതിന് നൂറിൽ പുറത്ത് വർഷങ്ങൾ പിന്നോട്ട് പോയാൽ കഡാവർ നായ്ക്കളെ കുറ്റാന്വേഷണ രംഗത്ത് ഉപയോഗിക്കാൻ വഴിതെളിക്കുന്ന ഒരു കേസ് ജർമൻ കുറ്റാന്വേഷണ രംഗത്ത് നടക്കുകയുണ്ടായി.
1809 ൽ ജർമൻ കുറ്റാന്വേഷണ രംഗത്ത് ഒരു പ്രമാദമായ കേസ് ഒരു കോടതി ക്ലാർക്ക് തന്റെ നായയെ ഉപയോഗിച്ച് കഡാവർ കുറ്റാന്വേഷണം നടത്തി കേസ് തെളിയിച്ചു. ജർമനിയിൽ തുടർച്ചയായി കൊലപാതകങ്ങൾ നടത്തി കൊണ്ടിരുന്ന ബവാറിയൻ റിപ്പർ എന്നറിയപ്പെട്ടിരുന്ന ആൻഡ്രിയാസ് ബിച്ചർ എന്ന സൈക്കോ കുറ്റവാളിയെ പിടികൂടിയ കേസ്.1806ലും 1808ലും ജർമനിയിലെ ബവാറിയയിൽ നിന്ന് രണ്ട് പെൺകുട്ടികളെ സംശയാസ്പദമായ രീതിയിൽ കാണാതാവുന്നു. ഒരു പെൺകുട്ടി കാണാതാവുന്നതിന് മുൻപ് ആഡൻഡ്രിയാസ് ബിച്ചറിന്റെ വീട് സന്ദർശിച്ചതിന് തെളിവുകൾ ഉണ്ട് എന്നാൽ ബിച്ചറിനെ ചോദ്യം ചെയ്തപ്പോൾ പെൺകുട്ടി തന്റെ വീട്ടിൽ നിന്ന് മറ്റൊരാളുടെ കൂടെ പോയി എന്ന് ബിച്ചർ സമർത്ഥിച്ചു.1809 മെയ് മാസത്തിൽ ഈ പെൺകുട്ടികളിൽ ഒരാളുടെ സഹോദരി ഒരു തയ്യൽ കടയിൽ പോവുകയും അവടെ വച്ച് കാണാതായ തന്റെ സഹോദരിയുടെ വസ്ത്രത്തിന്റെ ഒരു ഭാഗം കാണുകയും ചെയ്തു. അവർ പോലീസിൽ അറിയിച്ചതിൻ പ്രകാരം തുന്നൽകാരനെ പോലീസ് ചോദ്യം ചെയ്തപ്പോൾ, ആ തുണി ആൻഡ്രിയാസ് ബിച്ചർ കുപ്പായം തുന്നാൻ കൊടുത്ത തുണി ആണെന്നറിഞ്ഞു.ബിച്ചറിന്റെ വീട് പരിശോധിക്കാൻ കോടതി ഉത്തരവിടുകയും ചെയ്തു. പരിശോധനയെ തുടർന്ന് മരിച്ച പെൺകുട്ടികളുടെയെല്ലാം വസ്ത്രങ്ങൾ അവിടെ നിന്ന് കണ്ടെത്തിയെങ്കിലും ശവശരീരങ്ങൾ ഒന്നും തന്നെ കണ്ടെടുക്കാൻ കഴിഞ്ഞില്ല. രണ്ട് ദിവസങ്ങൾക്ക് ശേഷം കോടതിയിലെ ക്ലാർക്ക് തന്റെ നായുമായി ബീച്ചറുടെ വീട് സന്ദർശിക്കുകയും തന്റെ നായയോട് വെറുതെ സ്മെൽ പറയുകയും ചെയ്തു ആധുനിക ട്രാക്കിങ്ങ് കഡാവർ സാങ്കേതികത ഒന്നും അറിയില്ലാത്ത നായ ക്ലാർക്ക് പഠിപ്പിച്ച രീതിയിൽ ജോലി ആരംഭിച്ചു.
നായ തന്റെ യജമാനനെ വീടിനു പിറകിലുള്ള തടി ഷെഡിലേക്ക് നയിക്കുകയും അവടെ ചെന്ന് നായ് തറകുഴിക്കുകയും കുരക്കുകയും ചെയ്തു.ഇതിനെ തുടർന്ന് അവിടെ കുഴിച്ച് നോക്കിയപ്പോൾ കൊല ചെയ്യപ്പെട്ട എല്ലാ പെൺകുട്ടികളുടെയും ശരീരാവശിഷ്ടങ്ങൾ അവിടെ നിന്ന് കണ്ടെത്തി.ബിച്ചർ കേസാണ് നായ്ക്കളെ സഡാവർ ജോലിക്ക് ഉപയോഗിക്കാൻ പ്രചോദനം കൊടുത്തു കൊണ്ട് റെക്കോർഡ് ചെയ്യപ്പെട്ട ആദ്യ കേസ്.
ആദ്യമേ നമ്മൾ പറഞ്ഞാരുന്നു ഒരു ശവശരീരം ജീർണ്ണിക്കുമ്പോൾ 400ൽ കൂടുതൽ രാസ സംയുക്തങ്ങൾ ഉണ്ടാകുന്നു. അതിൽ പ്യൂട്രിസ്റ്റിന്റെയും കെഡാവറെനിന്റെയും മണങ്ങൾ വർഷങ്ങളോളം ശവശരീരം മറവ് ചെയ്ത സ്ഥലങ്ങളിൽ തങ്ങി നില്ക്കുന്നു. കഡാവർ നായകളെ ഹ്യൂമൻ റിമെയ്ൻസ് ഡിറ്റക്ഷൻ നായ്ക്കളെന്നും HRD അറിയപ്പെടുന്നു.
ലീഷിലും ഓഫ് ലീഷിലും ജോലി ചെയ്യുന്ന ഇവർ ഇവരുടെ ജോലി തുടങ്ങി കഴിഞ്ഞാൽ വളരെയധികം ശ്രദ്ധയോടെ മണം പിടിച്ച് കൊണ്ട് ചുറ്റിത്തിരിയുകയും സംശയം തോന്നുന്ന സ്ഥലങ്ങളിൽ കാല് കൊണ്ട് കുഴിച്ച് കൂടുതൽ മണം എടുക്കുകയും ചെയ്യുന്നു. മനുഷ്യാവശിഷ്ടം ഉണ്ടെന്ന് മനസ്സിലാക്കി കഴിഞ്ഞാൽ ട്രാക്കർ നായ്ക്കൾ ചെയ്യുന്നത് പോലെ കുരച്ച് സൂചന തരികയൊ അല്ലെങ്കിൽ ആ സ്ഥലത്ത് ഇരുന്നോ കിടന്നോ സൂചന തരികയൊ ചെയ്യുന്നു.അപ്പോൾ ഒരാളെ കൊന്നിട്ട് കത്തിച്ച് ചാരമാക്കിയാൽ ഒരു കുഞ്ഞും അറിയില്ലെന്ന ധാരണയും അവർ തിരുത്തും. പൊതുവേ ഉള്ള ധാരണ അനുസരിച്ച് ശരീരം കത്തി ചാരമാകുന്നതോടെ ആ വ്യക്തിയെ സംബന്ധിച്ച എല്ലാ മണങ്ങളും അവസാനിക്കുന്നു എന്ന ധാരണയും അവരുടെ അസാമാന്യ ഘ്രാണശക്തിക്ക് മുന്നിൽ അടിയറവ് പറയുന്നു. കഡാവർ നായ്ക്കൾ ചാരങ്ങളിൽ നിന്നും തെളിവുകൾ നല്കുന്നു.
അങ്ങനാണെങ്കിൽ ശരീരം വെള്ളത്തിനടിയിൽ ഒളിപ്പിച്ചാൽ രക്ഷപെടും, അല്ലേ..ഒരിക്കലും രക്ഷപെടില്ല പക്ഷെ ഉറപ്പായും പെടും. വെള്ളത്തിനടിയിൽ ഒളിപ്പിക്കപ്പെടുന്ന ശരീരങ്ങളും കഡാവർ നായ്ക്കൾ വളരെ കൃത്യതയോടെ കണ്ടെടുക്കുന്നു എന്ന് ന്യൂ ജഴ്സി ആസ്ഥാനമായി ഇറങ്ങുന്ന പ്രശസ്ത ഫോറൻസിക് മാഗസിനിൽ വളരെ വലിയ ആർട്ടിക്കിൾ വിശദീകരിക്കുന്നു. അത് പോലെ കഡാവർ നായ്ക്കളെ കുറിച്ച് CBC - Canadian broadcasting corporation റിപ്പോർട്ട് ചെയ്ത ഒരു വലിയ വാർത്തയുണ്ട്, കാനഡയിലെ ഏലിയട്ട് തടാകത്തിൽ കാണാതായ ഒരാളെ കണ്ടെത്താൻ ഡൈവിങ്ങ് ടീം 12 ദിവസം നടത്തിയ കഠിന പരിശ്രമം പരാജയപ്പെട്ടതിന് ശേഷം "പൈപ്പർ" എന്ന കഡാവർ നായയുമായി അവർ വീണ്ടും തിരച്ചിൽ നടത്തി.തടാകത്തിന്റെ ഒരു പ്രത്യേക സ്ഥലത്തെത്തിയപ്പോൾ ഭയങ്കരമായി കുരച്ചതിനെ തുടർന്ന് ഡൈവർമാർ പൈപ്പർ കുരച്ചതിന് താഴെ ആഴങ്ങളിൽ നിന്ന് ശരീരം കണ്ടെടുക്കുകയും ചെയ്തു.
ഈ മേഖലയിൽ നടന്ന എല്ലാ പഠനങ്ങളും കഡാവർ നായ്ക്കൾ എല്ലാ തരം കേസുകളിലും 95% കൃത്യത നല്കുന്നതാണെന്ന് ഇന്നത്തെ കണ്ടത്തലും അടിവരയിട്ട് സ്ഥാപിക്കുന്നു.
കടപ്പാട്: അജിത് മാധവൻ
കേരളാ പൊലീസ് K9 ഡോഗ് ട്രെയിനർ.
