രാജ്യത്തെ പ്രമുഖ ടെലികോം കമ്പനികളായ ജിയോ, എയർടെൽ, വോഡഫോൺ ഐഡിയ എന്നിവർ പ്ലാൻ നിരക്കുകളിൽ വീണ്ടും വർധന വരുത്തി. ഉപഭോക്താക്കൾ ഏറെ ആശ്രയിച്ചിരുന്ന ജനപ്രിയ പ്ലാനുകളുടെ കാലാവധി കുറച്ചും നിരക്ക് ഉയർത്തിയുമാണ് കമ്പനികളുടെ നീക്കം.
റിലയൻസ് ജിയോ 195 രൂപയുടെ പ്ലാൻ കാലാവധി 90 ദിവസത്തിൽ നിന്ന് 30 ദിവസമായി കുറച്ചു. എയർടെൽ 859 രൂപയുടെ പ്ലാൻ നിരക്ക് 899 രൂപയാക്കി ഉയർത്തിയിട്ടുണ്ട്. പൊതുമേഖലാ സ്ഥാപനമായ ബിഎസ്എൻഎല്ലും ചില പ്ലാനുകളുടെ കാലാവധിയിൽ മാറ്റം വരുത്തി.
അതേസമയം, സ്മാർട്ട്ഫോണുകൾ ഇല്ലാത്തവർക്കും ഡിജിറ്റൽ ബാങ്കിംഗ് സൗകര്യം ലഭ്യമാക്കുന്നതിനായി റിലയൻസ് ജിയോയും ബാങ്ക് ഓഫ് ബറോഡയും പുതിയ പങ്കാളിത്തം പ്രഖ്യാപിച്ചു. ജിയോഫോൺ പ്രൈമ 4ജി ഉപയോക്താക്കൾക്കായി 'ബോബ് വേൾഡ് ലൈറ്റ്' എന്ന പ്രത്യേക ബാങ്കിംഗ് ആപ്പ് പുറത്തിറക്കി.
ഫീച്ചർ ഫോണുകൾക്കായി രൂപകൽപ്പന ചെയ്ത ഇന്ത്യയിലെ ആദ്യത്തെ സമഗ്ര ബാങ്കിംഗ് ആപ്പാണിത്. യുപിഐ വഴി പണമടയ്ക്കൽ, ഫണ്ട് ട്രാൻസ്ഫർ, ബിൽ പേയ്മെന്റ് തുടങ്ങിയ സേവനങ്ങൾ ലളിതമായ കീപാഡ് നാവിഗേഷനിലൂടെ ഇതിൽ ലഭ്യമാകും.
